L.P. #1: Ako ay Bilog

Isa-isa kong binalikan ang mga nakaraang larawan (2005-2007) na aking kinunan sa pamamagitan ng aking Sony Cybershot DSC-L1. Mayo 2005 nang ang kamerang ito'y iniregalo sa akin ng isa sa mga nakatatanda kong kapatid. Maliban sa kanyang paunang regalo para sa aking kaarawan sa darating na Hulyo nang taong iyon, ito raw ay akin ring "premyo" matapos kong makakuha nang isang maikling iskolarsyip sa Estados Unidos. Mas magiging makabuluhan at masaya nga naman ang aking napipintong pag-aaral noon sa iba't ibang lugar sa Amerika sa loob nang anim na linggo (Hunyo 11 - Hulyo 24) kung aking maisasa-alala ang mga lugar, bagay-bagay, at mga tao na aking nakasalamuha sa byaheng ito.

Narito ang apat na larawang may hugis bilog ~ kung saan nakatutuwang isipin na ang mga ito'y sumasalamin sa ilang aspeto nang aking katauhan. :D

Ang ceiling ng South Carolina State Legislature

Ang tinapos kong kurso noong kolehiyo ay Agham Pampulitika. Hindi nakapagtataka na ang makapasok sa ganitong institusyon sa South Carolina, USA ay muling nakapanumbalik sa aking apat na taong (1992-1996) pagsusunog nang kilay sa Unibersidad ng Pilipinas-Maynila. Ang pagbisita sa Lehislaturang ito ay nagbigay-alala rin sa aking makulay at halos tatlong taong pagseserbisyo sa Senado ng Pilipinas taong 1999-2002.

Ang lugar kung saan binaril si John Lennon

Paalis na kami mula sa maghapong pagpi-piknik sa Central Park, New York. Ilan sa aking mga kamag-aral at kaibigan mula sa Mataas na Paaralang Pang-Agham ng Maynila ay nagmagandang-loob na ipasyal ako sa napakalaking park na ito. Nang kami nang aking kaibigang si Dave ay papunta na sa kinaroroonan nang kanyang sasakyan, itinuro at ipinakita niya sa akin ang makasaysayang lugar na ito. Tulad ni John Lennon, ang aking puso't isipan ay mayaman sa ideyalismo. Ang kanyang awiting Imagine ay isa sa mga paborito kong kanta na may napakagandang mensahe.

Ang Xtremely Xpresso Pizza sa Subic

Kasama ang mga estudyante ko sa UPEPO (UP Extension Program in Olongapo) na pawang mga propesyonal sa kani-kanilang larangan, aming ipinagdiwang ang huling araw nang aming pasok sa restawrang ito sa loob ng Subic Freeport Zone, Zambales (ang lugar na ito ay sa dakong norte ng Luzon). Ang pizza ay isa sa mga pinakapaborito kong pagkain. Kailan kaya ulit ako makakapunta dito sa Xtremely Xpresso?

Cafe Mocha sa isang Kapihan sa Naga

Kasama ang aking ina, kamag-aral noong elementarya, at mga kaibigang pari at seminarista, kami ay nagkape at naghuntahan sa isang kapihan sa Naga City, Camarines Sur. Nakaligtaan ko ang pangalan nang kapihan na ito ngunit ang sarap nang mainit na kapeng ito ay di ko malilimutan. Ang cafe mocha ang kadalasang uri ng kape na aking ino-order sa anumang coffee shop na aking puntahan.

*****

Ito ang aking munting kontribusyon ngayong Huwebes sa Litratong Pinoy. :D