L.P. #11: Kalayaan

Ngayon ay ipinagdiriwang sa bansang Pilipinas ang 'Araw ng Kalayaan.'

Kapag ako ay nagkakaroon nang pagkakataon, kinukuhanan ko ng litrato ang ating pambansang watawat saan mang dako ko ito makita. :-) Kaya naman ngayong araw na ito, naisipan kong huwag nang lumayo pa mula sa aking kinaroroonan. Isang palapag lamang pababa mula sa aking 'work area' ay mababanaag ang tanawing ito....

Nanariwa sa aking kamalayan ang naganap na unang pamamahayag nang kalayaan o kasarinlan ng Pilipinas ni Heneral Emilio Aguinaldo noong ika-12 ng Hunyo, 1898 -- isang daan at sampung (110) taon na ang nakalilipas. Hindi ba't sa balkonahe nang kanyang bahay sa Kawit, Cavite naganap ang nasabing deklarasyon at dito rin unang iwinagayway ang ating unang watawat?

Makailang hakbang pa mula nang kunan ko ang unang litrato, binagtas ko ang direksyon nang balkonahe....

Malapitan kong kinunan ang simbolo nang ating pagiging malaya bilang mamamayang Pilipino. Lumalakas ang ihip nang hangin at nagsisimula na ring kumulimlim ang panahon bagama't tanghaling tapat nang kunan ko ito.

Hindi ba't tunay na kaygandang pagmasdan ang ating pambansang watawat, taglay ang tingkad nang mga kulay bughaw, pula, puti at dilaw?

Bago ko tapusin ang lahok ko ngayong Huwebes sa Litratong Pinoy, nais kong ibahagi ang isang maikling akda mula sa Tagalog na Wikipedia:

"Ang Pamamahayag ng Kalayaan ng Pilipinas ay ginanap noong Hunyo 12, 1898, kung saan idineklara ng mga Pilipinong rebolusyonaryo sa pamumuno ni Heneral Emilio Aguinaldo (na naging Unang Pangulo ng Pilipinas) ang soberanya at kalayaan ng Pilipinas mula sa Espanya matapos matalo ang mga ito sa labanan sa Look ng Maynila sa Digmaang Espanyol-Amerikano.

Ang deklarasyon ay hindi kinilala ng Estados Unidos at Espanya. Pagpapatunay ito nang ilipat ng pamahalaan ng Espanya ang Pilipinas sa Estados Unidos sa Kasunduan sa Paris, para sa halaga ng mga salaping nawala sa digmaan.

Kinilala lamang ng Estados Unidos ang kalayaan ng Pilipinas noong Hulyo 4, 1946. Ipinagdiwang ang Araw ng Kalayaan noong Hulyo 4, ngunit dahil sa nasyonalismo at sa payo ng mga eksperto ng kasaysayan ng bansa, ang Batas Republika Blg. 4166 ay nilagdaan ni Pangulong Diosdado Macapagal noong 1964, na naglipat ng Araw ng Kalayaan mula sa Hulyo 4 sa Hunyo 12."

Isang mapagpalayang araw sa ating lahat!