L.P. #9: Ihip ng Hangin

Bumabawi ang inyong lingkod sa huli kong pagsumite nang lahok sa LP noong nakaraang tema. Kaya't narito ang ilang larawang nakunan ko taong 2005 at 2007 kung saan masasalamin ang 'ihip ng hangin'....

Kuha ko ito habang binabaybay ang isa sa mga 'freeway' sa California kasama ang aking kaibigan noong hayskul at kanyang mag-ama. Patungo kami sa Dublin mula sa Tracy.... Nang binalikan ko ang larawang ito, saka ko lamang napagtanto na ang ilan sa mga 'windmills' na ito ay tila mga nagkasira na? Bakit at paano kaya nangyari ang mga ito? Dahil kaya minsang lumakas nang todo ang ihip nang hangin??

Muli, bilang isang pasahero sa sasakyang ngayon naman ay minamaneho nang aking Ate, nadaanan namin ang mga 'windmills' na ito patungo namang San Jose, California. Sa bilis nang takbo nang aming sasakyan sa 'freeway' ay ikinagagalak kong makuhanan ang mga makinang ito na pinatatakbo nang ihip nang hangin. Epektibo raw ang mga ito sa pagbibigay enerhiya sa mga nasasakupang lugar.
Narito pa ang ilan sa napakaraming 'windmills' na aking nasaksihan sa kahabaan nang 'freeway.' Syempre pa, ang tanawing ito'y lubos na nakapagpapaalala sa akin nang ating mga 'windmills' sa gawing Ilocos Norte. :)

Dahil na rin sa pag-alaala nang Araw nang Pambansang Watawat (o 'National Flag Day'), ang mga sumusunod na larawan ay ibinabahagi ko sa lahat, lalong-lalo na sa mga kapwa ko Pinoy, bilang isang paggunita at pagsaludo sa ating angking talino at galing....

Ang watawat nang Pilipinas na pumapaimbulog sa bakuran nang ating Embahada sa Washington DC, USA
Sagisag nang kabayanihan nang mga kapwa Pilipinong naghahangad tumulong sa ating bansa sa pamamagitan nang pagtulong sa mga nagnanais na magkaroon nang sariling tirahan at mabuting pamumuhay. Bawat Pilipino, Bayani!
Gaano man kalakas ang ihip nang hangin, ang watawat na ito'y mananatiling sagisag nang ating mahal na Republika nang Pilipinas!

Sana'y naibigan ninyo ang aking mga munting lahok ngayong Huwebes sa Litratong Pinoy.

Magandang araw sa lahat at ako'y 'excited' na sa ating napipintong LP salu-salo! :D

L.P. #8: Tubig

Huli man daw at magaling, naihahabol din??!

Tsk, tsk, tsk.... nahuli nang isang linggo ang aking mga lahok sa Litratong Pinoy para sa temang TUBIG. Nais ko ring ipagpaumanhing muli sa mga katotong bumisita sa aking nakaraang lahok ang di ko pa pagsilip sa inyong mga larawan. Sadya pong napakaraming gawain sa aking bagong trabaho nitong nakaraang dalawang linggo. Sisikapin ko po kayong mabisita sa darating na mga araw. :)

Ang mga susunod na larawan ay iba't ibang interpretasyon ko sa tema nang LP noong nakaraang Huwebes, ika-22 nang Mayo. Ang lahat ay mula sa aking "baul" nang mga kuhang litrato mula taong 2005 (kung saan una akong nagkaroon nang digital camera).... maliban po lamang sa unang larawan na kuha ko kamakailan lamang gamit ang aking camera phone. ;)

ANG IBA'T-IBANG ANYO NANG TUBIG

Isang nakauuhaw na hapon matapos ang dalawang oras na 'Board meeting'

Kuha mula sa loob nang aming pribadong bus habang nililibot namin ang lugar nang Charleston, South Carolina
Mas malakas na patak nang tubig-ulan mula sa bintana nang aming kuwarto sa Jury's Hotel, Dupont Circle nang Washington DC
Uuyy! 'Waterworld'.... isa sa mga atraksyon sa loob nang Universal Studios, Los Angeles, California. Kasama kong lumibot dito ang isang mabuting kaibigan mula pa noong hayskul na si Richard ~ na nakabase na sa Amerika.

Sa 'loob' nang Waterworld set/show.... kitang-kita ang hagupit at hampas nang tubig, hindi ba?

Hehehe... bakit nga ba di ko nahalungkat ang larawan na ito sa temang 'Umaapoy'? May tubig na, may apoy pa! :)

Teka... ano naman ang 'kasayahan' o 'kaguluhang' ito??!

Hindi po sila nagra-'rally'.... masayang-masaya lamang na nagpapabasa mula sa tubig nang 'fire truck' matapos ang ilang araw na pagkakabilad sa arawan habang nagtatayo nang mga bahay sa isang GK Village sa bayan nang Goa, Camarines Sur.

Ang mga 'bumbero'

Bata o matanda, lalaki o babae, lahat nagsasaya sa dulot na presko nang tubig!

Minsan ko nang naisulat dito sa aking blog ang paborito kong lugar na ito sa University of South Carolina (Columbia, SC)

Mahilig talaga akong kumuha nang mga 'water fountain'.... ang isang ito'y kuha ko mula sa aming pribadong bus habang nililibot ang siyudad nang Los Angeles, CA.

Tubig mula naman sa 'fountain' nang Paco Park... isa ito sa pinakapaborito kong kuha sa mga koleksyon ko nang mga larawan nang 'water fountain' :D

Narito pa ang isa... Kuha ko ang mga ito habang nagre-'reception' sa kasalan nang aking pinsan. Pababa na ang araw nang mga oras na ito.

Isa sa mga makasaysayang 'canal' ~ ang C&O Canal ~ sa Georgetown, Washington DC. Naranasan ko ang sumakay sa isa sa mga 'canal boats'... isa sa mga sinaunang paraan nang pagbibiyahe sa lugar na ito lalo pa't kapag patungo sa Potomac River.

Ang malinis at asul na tubig-dagat/lawa(?) nang Monterey Bay sa California

Nami-miss ko ang mga-knee/wakeboarding sa CamSur! Kuha ko ito sa isang kaibigan nang simulan na niya ang isang 'round' nang kneeboarding sa CamSur Watersports Complex. Kakaiba ang naibibigay na 'hype' sa akin nang bawat hampas nang tubig at hangin habang ine-'enjoy' ko ang isport na ito. :D

Ang aking mga pamangkin dito sa Pilipinas (maliban kay LJ na di nakasama sa bakasyon naming ito) ay walang sawa sa pagtatampisaw sa malinis at malinaw na tubig-dagat nang Boracay... keber kung gaano pa katindi ang sikat nang araw!

Haaay.... kailan kaya ako muling makakabalik dito sa ikalimang pagkakataon? Ang 'beachfront' nang Boracay mula (ata) sa Boracay Regency Resort, Station 2.

Maligayang LP sa lahat!!!

L.P. #7: Umaapoy

Isang maalab na Huwebes sa inyong lahat! :D

Narito ang aking mga lahok sa linggong ito nang Litratong Pinoy. Mula pa noong isang linggo, iniisip ko na kung ano ang maaari kong kunan nang litrato na nagpapahiwatig sa tema ngayong Huwebes, "umaapoy."

Napagdiskitahan ko tuloy ang aming gas range sa bahay at pagkauwing-pagkauwi naming mag-asawa kagabi, ay nagpainit na kami nang tubig sa takure. Inihahanda na rin namin ang aming mainit na tubig para sa kape sa kinaumagahan... Ang apat na sumusunod na larawan ay mga kuha ko gamit ang aking 'maaasahang' camera phone. ;)

Medyo bagong bukas pa ang kalan....

Ipinihit ko sa pinakamalakas na apoy at kinunan ito nang malapitan :)

Hayan... mayroon nang nakapatong dito sa umaapoy na kalan! Ano nga ito?!

Tyaaa-raaaan!!! Walang iba kundi ang aming mahal na takure
na iniregalo sa amin noong aming kasal! :D

Matapos kunan ang mga ito at ma-download ang mga litrato mula sa aking cellphone, bigla kong naalala ang mga "luma" kong litrato na nagpapahiwatig din nang apoy.... Dali-dali kong hinalukay ang mga files sa aking My Pictures folder at sa wakas, nakita ang ilang litratong kuha ko noong isang taon (2007) sa Clark, Angeles, Pampanga.

Ang pagdiriwang na ito ay walang iba kundi ang Hot Air Balloon Festival na ginaganap tuwing Pebrero sa Clark Air Base. Kung hindi ako nagkakamali, pang-sampung taon na nang pagdaraos nito noong masaksihan namin noong nakaraang taon. :)

Narito ang ilang piling kuha gamit naman ang aking Sony cybershot digital camera....Tuwang-tuwa ako nang ma-timing-an ko ang pagbuga nang apoy mula sa pinaka-base nang nakadipa pang "balloon' na ito.... kaya pala tinatawag talaga itong 'hot air balloon'.... mainit na apoy ang binubuga upang "malagyan" nang hangin ang malaking lobong ito. :D

Heto pa ang isa kung saan kitang-kita at saktong nakuhanan ko ang malakas na pagliyab nang apoy mula sa mala-basket na base nang hot air balloon. Marami sila na nagtutulong-tulong upang malagyan nang hangin at tuluyang maitayo (at nang lumaon ay mapalipad o mapaangat man lang) ang mga hot air balloon na tulad nito.

Bagaman tigil-apoy muna sa larawang ito, nais ko lamang ipakita na medyo lumobo na at nalagyan na nang mainit na hangin ang loob nitong makulay na 'lobo.' Nakakaaliw, hindi ba?

At siyempre pa, narito ang isa sa mga ganap nang hot air balloon! :D

Inyong mapapansin na patuloy ang pagbuga nang apoy sa loob nito... ito ay para na rin mapanatili ang korte nang naturang 'lobo.' Kuha ko ito nang kinagabihan na at kasalukuyang ginaganap ang tinaguriang "Lights and Sounds Show" na sinasabing pinakatampok sa piyestang ito. Ayos ba ang napili kong huling larawan para sa lahok ko ngayong Huwebes sa LP?

Tunay na isang Tatak Pinoy rin ito, hindi ba? Hangad ko na tayong mga mamamayang Pilipino ay patuloy na magkaroon nang nag-aalab na pagmamahal sa ating dakilang bayan.... ang Republika ng Pilipinas!

Mabuhay tayong lahat!

L.P. #6: Mahal na Ina

Wala nang patumpik-tumpik pa, ang aking mga lahok sa Litratong Pinoy ay ilang litratong kuha ko sa aking mahal na Ina. Siya rin ay magdaraos nang kanyang ika-animnapu't walong kaarawan sa susunod na Huwebes, ika-15 ng Mayo.

Natural na masayahin ang aking Ina. Hanga ako sa taglay niyang tibay ng loob, sipag at tiyaga, at maabilidad na diskarte sa buhay. Isang mapagmahal na Ina, siya rin ay malapit sa ating Poong Maykapal at isa ring deboto nang Mahal na Birhen.

Ang mga sumusunod na larawan ay mga kuha ko noong nakaraang taon (2007). Kapansin-pansin ang natural din niyang pagkahilig sa pagpapakuha nang litrato tulad ko (hmmm, kanino pa ba ako magmamana?). ;)

Maraming salamat sa iyo, mahal kong Ina! Isang paunang pagbati para sa darating na Araw ng mga Ina sa Linggo at iyong kaarawan sa susunod na Huwebes. Nawa'y patnubayan ka nang ating Panginoon at bigyan nang marami pang biyayang walang-sawa mong ibinabahagi sa aming lahat. Hangad ko ang iyong mahaba pang buhay kapiling ang ating pamilya at lahat nang iyong mga kaibigan; ang iyong mabuting kalusugan; kapayapaan; at kaligayahan.

Nagmamahal, ang iyong Bunso. :)

Introduction

I am now working full-time as Senior Executive Assistant to the Executive Director of the Philippine Business for Social Progress (PBSP). Here's how W, now the Foundation Affairs Unit Manager, introduced me to everyone via e-mail....

-----

Dear colleagues,

Let's welcome JUDY ACA-SACLAMITAO to the PBSP family!

Judy was into freelance teaching and was working part-time for Gawad Kalinga prior to joining PBSP. Judy also worked for the Senate. She studied at the Manila Science High School, and UP (Masters degree in Public Administration, and BA Political Science - cum laude). She was a Visiting Fellow at the Study of U.S. Institutes (formerly Fulbright) at the University of South Carolina. Her interests are Asia-Pacific studies, globalization, national and local government relations, and governance issues.

Lebel na lebel di ba?... " )

Eman Ragasa is her friend (so we got to Judy straight away, thanks Sem!). Newly-wed sya! Her skin is flawless (nasa Humana ang derma nya -- Dra. Susan Arcigal). She plays badminton. " )

Cheers to Judy! Suportahan taka!

-----

Thanks again, W! Di talaga kinaya nang powers ko 'yung flawless skin part... This was indeed a very candid description about me. :D

New Job

It has been fourteen working days since I started with my new job. That partly explains my 'seeming silence' at blogging these days. Well, with the exception of my LP entries, of course.

I am faced with very challenging work demands but I am glad that I am getting by.... Thanks to the former person occupying my position ~ she has truly been supportive and a good mentor to me!

I will share in my next post how she introduced me to our colleagues in the organization via e-mail. Her very candid description of both my professional background and a little something about myself really rocks!

Stay tuned, folks. :-)

L.P. #5: Malungkot

Alas! Ipagpaumanhin at nahuli na naman ako nang ilang oras sa aking mga lahok ngayong linggo sa Litratong Pinoy.... Muli ay Biyernes na naman nang madaling-araw at tulad nang nakaraang linggo, ay di ako umabot sa takdang oras ng Huwebes. :-(

Gayunpaman, narito ang samu't sari kong larawan na kuha mula taong 2005 hanggang sa kasalukuyan na pawang sumasalamin nang iba't ibang kalungkutan ~ ang tema ngayon sa LP.

Una. Sulyap mula sa Bintana

Ito ay kuha ko mula sa aking silid (#535) nang Jury's Hotel, Dupont Circle nang Washington DC. Isang di malilimutang gabi, kung saan ako ay nag-iisa habang malakas na humahagupit ang ulan pati na rin ang mga kulog at kidlat sa labas nang aking kinaroroonan. Noon ay ika-siyam nang gabi at sa saliw nang awiting 'Weak,' ay magkahalong lungkot at pangamba ang aking nararamdaman. Aking napagtanto na ang aking kalungkutan ay di lamang dala nang isang masamang panahon; bagkus ay ang matinding pangungulila sa mga mahal sa buhay na aking naiwan sa Pilipinas...

Ikalawa. Ang Mama at ang kanyang alagang aso

Matapos ang masaya at nakabubusog na hapunan sa 'Kabisera' (by Dencio's) sa B:2 nang Bonifacio High Street, The Fort (Taguig City), kami ay nagpalakad-lakad sa kahabaan nang may kabaguhang establisamentong ito (Bonifacio H.S.).... Nakasama ko noong Miyerkules nang gabi sa hapunang ito ang aking mahal na esposo at apat pa niyang kasamahan sa trabaho. Dahil sa pagnanais kong makakuha nang naaayon sa tema ng LP, pasimple kong ginamit ang aking celfone camera. Maaaninag sa larawang ito ang isang lalaking nakaupo katabi ang kanyang alagang asong puti (nakikita mo ba ito?) na kinunan ko mula sa kabilang dako nang water fountain area. Akin syang pinagmamasdan nang makailang minuto na rin ang lumipas nang kami'y napahinto sa lugar na ito. Dama ko ang animo'y pangungulila nang Mamang ito habang sya ay malayong nakatingin sa dako paroon at maka-ilang beses na napabubuntung-hininga...

Ikatlo. Ang Babae sa Restawran

Umiral na naman ang pagka-papparazzi ko! Kanina (Huwebes nang gabi) ay sinubukan namin ni Eric na kumain nang hapunan sa Ohana Hawaiian BBQ. Ang 'bagong'(?) restawran na ito ay matatagpuan sa Megamall. Naparami ata ang pamimili namin (salamat sa 10% off on all items only for May 1 promo ni G. Henry Sy para sa mga SM Advantage Cardholders at napagastos talaga kami, hehe! .... teka, ang lahat naman nang aming napamili kahit hindi sa loob nang SM Dept Store ay puro sale items rin naman po), at medyo pasado alas otso na rin nang gabi nang kami'y nagpasyang maghapunan. Habang hinihintay ang order naming mga pagkain, dumating ang babaeng ito at umupo sa may di kalayuang lamesa mula sa amiing kinaroroonan. Napaisip ako kung sya ba'y mayroong hinihintay o sadyang nababalisa sa kanyang pag-iisa. Di man kita sa larawang ito ang buo nyang mukha, bakas sa kanyang mga kilos ang matinding kalungkutan...

Ika-apat hanggang Ika-anim. Ang Lungkot nang Kahirapan

Pamilyar ba sa iyo ang lugar na ito? Marahil ay tipikal mo itong nakikita sa iba't ibang sulok sa Kalakhang Maynila... Oo, MALUNGKOT talagang makita ang ganitong paligid hindi lamang dahil sa ito'y isang eyesore sa dami nang nagkalat na dumi at basura; bagkus ay sumasalamin ito sa sinasabing pitumpung porsyento (70%) nang ating mga kababayan na naghihirap o living below poverty line sa kasalukuyang panahon.

Personal kong napuntahan at nasaksihan ang kahirapang ito sa lugar nang Baseco, Maynila. Kasama ang aking 'tour guide' (Dan B.) noong mga panahong iyon nang Marso 2007, ang aking pagdalaw rito ay bunga nang aking unang assignment mula kay G. Tony Meloto (o mas kilala bilang 'Tito Tony' o 'TM' sa mga taga-Gawad Kalinga). Matapos kong malibot ang parte nang Baseco kung saan naroroon ang naggagandahan at maaayos na tirahan na bumubuo sa komunidad nang GK, may mga ilang bahagi pa rin nang lugar na ito ang lugmok sa kahirapan.

Mapapansin sa huling larawan na ito ang sulyap nang pag-asa sa kabila nang kahirapang tumatamasa sa buong Baseco. Sinadya kong kunan ang ilang kabahayan na naitayo sa pamamagitan ng GK (mayroon ding iba na mula naman sa Habitat for Humanity), katabi ang ilan sa mga barong-barong na nagpapamalas nang lungkot nang kahirapan sa ating bayan.

*****

Umaasa akong naibigan ninyo at naging makabuluhan para sa inyo ang aking mga lahok ngayong linggong ito. Mabuhay ang Litratong Pinoy!